Dae sos Bizantinos a sos Saratzenos e a sos Giudicados

Càrolu Magnu

Non s'ischit bene cando sos bizantinos ant lassadu s'ìsula, ma est seguru chi finas a sos ùrtimos annos de su VII sèculu sa Sardigna teniat galu ligàmenes cun Bisàntziu.

Resurtat difatis chi tra su 663-68 sos sardos fiant obligados a pònnere parte de dinare issoro pro pagare sas ispesas istraordinàrias istabilias dae Costante II pro mantènnere sa flota; in su 680 s'archipìscamu de Casteddu Citonato est dèpidu andare a Costantinopoli pro respòndere de tzertas acusas chi l'incurpaiant de s'èssere cumportadu contra a sos interessos de s'Istadu; in su 687 resurtat chi est istadu imbiadu un'esèrtzitu Sardiniae, paris cun un'esèrtzitu africanu pro gherrare contra a sos Àrabos. A pustis de custos fatos non b'est prus peruna notìtzia. Non s'ischit nudda de s'istòria de sa Sardigna de sos ùrtimos duos sèculos de su primu millènniu, si podet però pensare, mancare chi non bi siant documentos chi lu cumprovent, chi sa Sardigna, oramai isulada pro sas invasiones de sos àrabos e duncas chene agiudos, ma cun una fortza militare comente si tocat, s'apat dadu un'organizatzione polìtica e amministrativa indipendente de su totu.
In tantu a su comintzu de su sèculu VIII comintzant sas invasiones bàrbaras nessi a fùrriu de sas costas; invasiones chi ant semenadu timorias e penas mannas e chi sunt adduradas pro belle bator sèculos.
Pro cumbàtere custas invasiones sos poderes prus mannos passant in manos de su giùdiche o Arconte de Casteddu chi annullat belle sas funtziones de su Dux de Forum Traiani ca est cambiada s'istratègia de difesa de s'ìsula. E gasi su Judex Sardiniae benit dotadu de prenos poderes tziviles e militares, fortzes giai dae s'agabbu de su sèculu VIII comente testimòniat unu sigillu grecu de Teodoro in ue b'est iscritu: Consul e dux Sardiniae.
E paret chi dae sos primos annos de su sèculu IX sa Sardigna esseret tentu unu guvernu indipendente si tenimus contu chi una delegatzione de notàbiles casteddajos si sunt presentados a sa corte de Ludovicu su Piu, fìgiu e erede de Càralu Magnu, pro dimandare agiudos contra a sos inimigos comunes, pro parare fronte duncas a sas invasiones bàrbaras.
E custu fatu est de grandu importu ca cheret nàrrere chi su cumandante de sa delegatzione e responsàbile de sa difesa de sa Sardigna teniat poderes prenos de guvernu de s'ìsula.
B'est tando puru su fatu chi, in su 854, su papa Leone IV at iscritu a unu giùdiche sardu, chene fàghere su nùmene suo, pro li dimandare un'esèrtzitu armadu pro sa difesa de Roma, minetzada dae sos bàrbaros: cheret nàrrere chi sa Sardigna non solu teniat unu guvernu autònomu, ma fiat dotada puru de una difesa militare tale chi podiat mandare agiudos finas pro difèndere àteras natziones.
Difatis su Papa no aiat istadu dimandadu agiudos a chie non teniat sa possibilidade de difèndere mancu a isse e totu dae sas invasiones bàrbaras.
E sos istòricos atestant chi giai dae sa metade de su sèculu IX sos documentos non faeddant prus de Consul, de Dux, ma solu de un'ùnicu capu cun su tìtulu de Judex o Arconte.
Non b'est però medas tzertesas de su guvernu de s'ìsula in custu perìodu e paret chi sos poderes de unu capu ùnicu siant durados pagu tempus e bi siant istados àteros judex o arcontes.
E custa situatzione nova si podet cumprèndere dae una lìtera de papa Nicolò I chi brigat sos giùdiches sardos pro s'usàntzia de s'isposare tra parentes custrintos. Ma finas Papa Juanne VIII in su 873 iscriet una lìtera a sos Prìntzipes Sardiniae.
Duncas si sos papas faeddant de Iudices o Prìntzipes Sardiniae cheret nàrrere chi custos fiant prus de unu.
Paret duncas chi sos giudicados siant derivados dae unu guvernu unitàriu, frutu de unu sistema mistu eletivu ereditàriu e pro voluntade de Deus e de su pòpulu, de un'ùnica famìlia regnante chi fiat sa de sos Lacon-Gunale residentes a Santa Ìgia, sa capitale chi oramai bi fiat a su postu de Casteddu, ca custa ùrtima est istada abbandonada belle de su totu in su sèculu VIII. S'ispiegat in custu modu finas proite sos regnantes benint totus dae sa matessi raighina e proite sos bator Istados, chi si sunt criados, apant tentu belle sas matessi istitutziones polìticas, giurìdicas e econòmicas.
Solu a pustis su Milli però essint a campu bene sos giudicados e tando oramai sunt bene marcados dae su puntu de vista amministrativu e sotziale, organizados segunde unu sistema de guvernu originale e pràticu chi est adduradu belle su matessi finas a cando si nche sunt finidos.
Su de Casteddu at agabbadu sa funtzione sua in su 1257, su de Torres in su 1258, su de sa Gaddura in su 1298 e su de Arborea in su 1410.
Cadaunu de custos Giudicados, mutidos in limba sarda Logos, fiat guvernadu dae unu monarca, Giùdiche. Mentres s'organizatzione amministrativa previdiat chi su regnu, su Logu, esseret divididu in curadorias o partes formadas dae medas biddas o paisos e amministradas dae unu curadore a su cale faghiant riferimentu sos rapresentantes de sas biddas, sos majores de villa, sos armentarios, sos majores de scolca e sos mandadores de rennu.
Su curadore beniat nominadu dae su Giùdiche, regulaiat s'impreu de sas terras pùblicas de sas biddas de sa curadoria, istabiliat sas làcanas tra sos sartos, peritziaiat sos dannos de su fogu, ammaniaiat su servìtziu armadu pro difèndere sas biddas, presidiat su tribunale de su dipartimentu, mutidu corona de curadoria.
Comente si podet cumprèndere duncas cada curadoria teniat un'autonomia amministrativa auto-sufficiente e funtzionale e su curadore teniat poderes prenos e supra de issu bi fiat solu su Giùdiche.