Ospitone, dux Barbaricinorum

OspitoneTra su 500 e su 600 a pustis de C. in sa Barbàgia bi fiat unu cumandante polìticu e militare chi si mutiat Ospitone, definidu dux Barbaricinorum in sa lìtera de su mese de maju de su 594, chi su papa Gregòriu Magnu l'aiat imbiadu.

S'ischit puru chi fiat in gherra cun sos Bizantinos, cumandados dae su generale Zabarda chi teniat su cuarteri militare suo in Forum Traiani, Fordongianus. Pròpiu in cussa ocasione Zabarda e Ospitone fiant pro concruire unu tratadu de paghe chi previdiat tinas sa cunversione de sos Barbaritzinos a su Cristianèsimu. Finas a tando, semper segunde sa lìtera de Gregòriu, solu Ospitone tra sos Barbaritzinos fiat batijadu, mentres sos àteros fiant ancora paganos. Eco ite naraiat in sa lìtera Gregòriu: Gregòriu Magnu a Ospitone, capu de sos Barbaritzinos: "Si comente nessunu de su pòpulu tuo est cristianu, puru dae cue si cumprendet cantu tue sias superiore a sos àteros, essende tra issos s'ùnicu cristianu.
Mentres difatis totus sos Barbaritzinos bivent comente animales e non connoschent su Deus beru, ma adorant sas perdas e sas àrbores, tue solu adoras su Deus beru. Ma sa fide chi tue as abbratzadu la depes pònnere in atu cun sas òperas bonas e a servìtziu de Cristos in su cale crees; as a dèpere impreare sa positzione bona e autorèvole tua, afilende cara a Issu totus cuddos chi as a pòdere, faghènde-los batijare e avertènde-los a pensare a sa vida eterna. Si pro casu tue, pro sos impignos chi tenes, non esseres pòdidu fàghere tantu, ti dimando, saludànde-di, de agiudare su pìscamu Felice e su padre Cirìacu chi apo mandadu a cue pro tale missione...".
E sa lìtera finit imbiande-li sa beneditzione de Santu Perdu, beneditzione chi est unu casu Pròpiu raru pro una personalidade non cresiàstica. Dimustrat duncas s'istima chi su Papa teniat pro Ospitone, chi non depiat èssere unu capu tribù e bastu, ma unu personàgiu de valore e de grandu importu. Sa beneditzione de Santu Perdu fiat collegada a una cadena de sos biados apòstolos Perdu e Paule e si depiat apicare in su tzugru. Duncas puru a Ospitone est istadu imbiadu un'ogetu sacru, beneitu, fortzes una cadena chi su capu barbaritzinu si depiat pònnere in su tzugru comente sinnale chi Santu Perdu lu podiat bardare.
Mentres sa matessi lìtera in latinu fiat: Gregorius Hospitoni Duci Barbaricinorum:
Cun de gente vestra nemo christianus sit, in hoc scio, qui omni gente tua es melior, quia tu in ea christianus inveniris. Dum enim Barbaricini omnes ut insensate animalia vivant, Deum verum nesciant, ligna autem lapides adorent: in eo ipso quod Deum verum colis, quantum omnes antecedas, ostenderis. Sed fidem quam percepisti, etiam bonis actibus; et Cristo, cui credis, offerre quod praevales; ut ad eum, quoscumque potueris, adducas, eosque baptizari facies, aeternam vitam dirigere admoneas. Quod si fortasse ipse agere non potes quia ad aliud occupari, salutans peto ut hominibus nostris, quos illuc trasmissimus, scolicist fratri, et coepiscopo meo Felice, filio quosque meo Cyriaco servo Dei, solatiari in omnibus debeas...
Dae sa lìtera de su Papa a Ospitone si cumprendet chi in cussa època sa Barbàgia fiat costituia in istadu autònomu, fortzes cun una soverania sua pròpia, si teniat unu dux, unu cumandante cun su cale depiat tratare finas su rapresentante de sos bizantinos, Zabarda. E sa lìtera testimòniat chi in sas zonas montanas de s'ìsula sa gente sighiat a adorare sas predas, sos bètiles, sighende a praticare cultos e adoratziones de sos tempos de sa tzivilidade nuràgica. No ischimus imbetzes dae cando esistiat custu istadu barbaritzinu e pro cantu tempus est sighidu a esìstere a pustis de Ospitone.
Non s'ischit mancu cale esserent sas làcanas giustas. Un'àtera dimanda chene risposta est: comente mai Ospitone fiat s'ùnicu batijadu? Chie l'at cumbèrtidu a sa religione catòlica? Sos istudiosos no ant galu dadu rispostas sicuras, ma ant fatu solu ipòtesis.
Ospitone, in sa fantasia de sa gente, de su pòpulu, benit pintadu semper comente s'ùrtimu eroe de sa resistèntzia sarda contra a sos invasores e numenadu comente esèmpiu de sos sardos balentes e in luta pro sa libertade de sa gente de sas terras de intro, de mesu.