Crisis polìticas e lutas a primos de su Noighentos

Su '900 in Itàlia comintzat cun sa morte de su re Umberto I chi rapresentat su sinnale pro èssere su sèculu de annos de sàmbene pro su tempus benidore.

Su perìodu tra su 1901 e su 1913 est dominadu dae sa polìtica de s'istatista Juanne Giolitti cun su cale si chircat de ammodernare s'istadu liberale paris cun sas primas riformas sotziales, naschias in unu clima positivu tra guvernu e setores moderados de su sotzialismu, ca tra sos sotzialistas at bintu sa parte riformista. E custu at caraterizadu sa neutralidade guvernativa in sos cunflitos sotziales faghende in modu chi esserent sas tratativas tra industriales e operajos a risòlvere sos problemas de su traballu.
Est cun Giolitti chi si faghent in custa època sas lees ispetziales pro s'isvilupu de su Mesudie de s'Itàlia, lees basadas su prus in su "crèditu agevoladu" a sas impresas e chi riguardaiant sa Basilicata, sa Calàbria, sa Sitzìlia, sa Sardigna e Nàpoli.
B'est istada in custu perìodu una crèschida econòmica manna cun tassos de isvilupu industriale artos e duncas puru un'aumentu de su rèdditu de sos italianos, ma s'emigratzione forte( 8 milliones de emigrados in deghe annos) cara a s'èsteru cunfirmaiat sas diferèntzias mannas e sos ischilìbrios tra su Nord e su Sud e tra sa tzitade e sa campagna.
In Europa bi fiant crisis e gherras locales chi poniant sos Istados in cuncurrèntzia tra issos e semper prus in luta pro sas colònias, comente est capitadu tra sa Germània e sa Frantza pro su Marocco. Ma puru in sos Balcanos bi fiant motivos de gherra in su 1908 mesche a pustis chi s'Àustria at ocupadu sa Bosnia-Erzegovina. S'Itàlia in su 1911 at dichiaradu gherra a sa Turchia pro si nche picare a Trìpoli (gherra de Lìbia).