MÒDULOS TRASVERSALES - Pro nde ischire de prus

Su cumplessu nuraghesu de Serra Òrrios de Durgali

Su villàgiu-santuàriu est postu in un'àera de basaltu de su Gollei, in su terrinu de Durgali. Fiat frecuentadu dae sa fine de su Brunzu antigu, pro totu su Brunzu mèdiu e, su prus, in su Brunzu reghente e ùrtimu.

Su cumplessu est unu de sos de importu prus mannu de sa Sardigna nuraghesa e fiat destinadu a acollire pellegrinos, ma puru atividades de mercadu, garas e giogos, in sas festas religiosas.
Cumprendet unu villàgiu-santuàriu cun belle chentu domitas, duos tèmpios minores cun mandras e duos sepurcros megalìticos.
Sas domitas a tzìrculu si presentant in parte isuladas, mentres sas àteras sunt postas paris in ses partes chi dant totus a una corte tzentrale, tzertas tenent sos putos-cisterna e putzigheddos cun canales pro s'abba, criadas a sicu cun filares non pròpiu regulares de basaltu a penas traballadu.
Sa ' domo de sos atopos ' tenet una pranta de belle 7 metros, mentres sa camera de intro, a forma cuadrada, tenet unu foghile in su tzentru de su pamentu.