Ponte Betzu de Illorai

Ponte Ezzu de Illorai

A ses chilòmetros dae sa bidda de Illorai b'est unu ponte tzerriadu Ponte Betzu subra su riu Tirsu.

A su comintzu fiat istadu costrùidu dae sos Romanos, ma a pustis, si comente si nch'est derrutu, est istadu torradu a fraigare diversas bortas in sos sèculos finas a tènnere sa forma chi nos podimus bìere oe, chi si narat a ischina de molente.
Sa forma a tres arcadas e mesu, cun bìndighi metros de lughe e trintaghimbe de longhia, bi l'ant data sos Pisanos in su sèculu XIV. Paret un'òpera de ingegneria chi nos mustrat comente sos antigos esserent in gradu de fraigare òperas chi addurant in su tempus cun meda abilesa. S'istrutura de su Ponte Betzu de Illorai est un'ispantu: collocadu supra duas rocas granìticas sòlidas chi li faghent de sustentu, ponet in collegamentu sas duas zonas separadas de su riu.