MÒDULOS TRASVERSALES - Pro nde ischire de prus

Las Plassas, unu casteddu istraordinàriu

Las Plassas

Sa tzintura de difesa de su Giudicadu de Arborea fiat rapresentada dae tres casteddos: su de Las Plassas, costrùidu in antis de su 1172, e sos casteddos d'Arcuentu e de Monreale, chi separaiat in cussu logu su Rennu de Arborea dae su de Càlari.

Custu Casteddu, su Giùdiche d'Arborea Barisone I (1146-1185), l'aiat donadu in pìngiu a su Comunu de Gènova. S'istòria de custu castrum cumprendet iscontros importantes tra Genovesos, Marianu IV cun Brancaleone Dòria, maridu de Leonera, e su Regnu de Sardigna.
Sa costrutzione sua, fata pro su controllu de su territòriu de su Rennu de Arborea, at tentu un'usu istratèzicu-militari de importu in medas batallas fatas e l'at a tènnere puru pro su Regnu de Sardigna a partire dae su 1410/20.
In intro bi fiant istantzas, turres, passaritzos, allògios, magasinos, putzos e sa corte.
Su Casteddu de Las Plassas, postu supra unu coddu chi est totu tundu, perfetamente, si biet dae a tesu e dae supra si biet totu su territòriu. Suta, sa bidda, chi comente su casteddu est de su Mediuevu, si presentat cun domos piticas ma puru mannas pro isvilupare medas traballos de coltivatzione in su sartu (comente su de su trigu) e pro allevare bestiàmene.
Cando cun sa Batalla de Seddori de su 1409 sa Sardigna passaiat suta sa Corona de Aragona, pro èssere istados bintos sos Sardos de Arborea, sa bidda de Las Plassas cun Villanovafranca e Barùmini, fiant istadas infeudadas a Perdu Besalù, ispagnolu, e a pustis a Azor Zapata, chi l'aiat comporada in su 1541 e aiat achistadu su privilègiu de nobilesa in su 1566 e su fèudu diveniat Baronia de Las Plassas.
Custu casteddu de Leonera de Arborea teniat una superfìtzie de 550 metros cuadrados e fiat semper bene difèndidu dae armados, seberados tra òmines fortes, bene addestrados, capassos de usare meda bene arcos e balestras, costruias cun linna de tasso e ùlumu, e àbiles cun sa birga sardisca, ma fiant puru capassos de èssere autònomos in totus sas netzessidades issoro, tantu a traballare sa linnàmene comente a costruere armas e a coghinare.
De in cue custos armados sunt essidos pro s'in nche ghetare in s'atropellidu de sa batalla famada de Seddori in su 1409, chi at sinnadu mescamente sa fine de su bisu d'indipendèntzia de su pòpulu sardu.