MÒDULOS TRASVERSALES - Pro nde ischire de prus

Su feudalèsimu a su tempus de sos ispagnolos

Medas puntos de s'istòria de custu perìodu abarrant ancora non acrarados. Si puru bi fiant sos feudatàrios chi abarraiant in Ispagna, lassende su guvernu de su fèudu a sos vassallos, si fiat formadu unu tzetu nòbile chi si fiat fatu semper prus sardu, chi si ocupaiat de su guvernu econòmicu de su fèudu e sighiat is adunàntzias de sos Istamentos.

De sos fèudos sardos podimus nàrrere chi teniant unu caràtere semper prus pagu militare e semper prus patrimoniale e giurisditzionale. Sa mobilidade de sos fèudos est testimoniada dae sas medas donatziones, venditas e dotes, chi fiant modos de alienare sos benes, e in bona parte fiant rapresentados dae sos "allodios", mentres sos "fèudos" fiant vinculados in sas trasmissiones.
Tra sos òneres fiscales chi agravaiant sa populatzione bi fiat su "feu "unu tributu personale pagadu in moneda o in natura a su segnore, si pagaiat a partire de sos 18 annos sinu a sos 60. Non lu pagaiant sos giòvanos finas a sos 18 annos, sas fèminas e sos pòberos. Bi fiant sas tassas pro sa produtzione, semper in moneda o in natura e sas dègumas a su cleru. Sos vassallos - in modu diferente pro onni fèudu - pagaiant sos tributos. In sos Istamentos medas bortas si chistionaiat de sos abusos.
Su regime giurìdicu de sas terras resguardaiant sas de s'ex-demàniu règiu chi fiant divènnidos demàniu feudale, est a nàrrere sas propiedades colletivas de sas comunidades rurales cun sos diritos tziviles, chi ant a agatare una solutzione in s'Otighentos.