Su sartu sacrificadu a sa tzitade

Sa campagna provedit a sa tzitade

Su sistema econimicu-produtivu de custu perìodu fiat caraterizadu dae su mercantilismu e dae sa polìtica protezionista de s'istadu piemontesu.

Sa burocratzia atropada isvilupat unu controllu chi impediat  calesisiat megioria de sa populatzione produtiva.
Custu sistema rendiat istàbiles e contrapostos sos interessos de su sartu cun sas tzitades, pro ite sas càssias règias godiant de sos privilègios de s'annona, garantida pro obligatoriedade dae sas campagnas.
Sos massajos fiant isfrutados a puntu chi non resessiant at pinnigare capitales pro trasformare s'agricultura arcàica.
Est de cunsiderare chi sa produtzione de su laore, chi fiat sa fonte prus manna de richesa de su regnu, fiat cumpromitia dae sas tassas (chi tra barones e crèsia arribbant a su 20% de sa produtzione), dae s'organizatzione burocràtica, costituia dae su controllu de totus sas fases: sa cunsigna, s'inserru, e s'aforru (pare-pare, sa prima pro istimare sa produtzione, sa segunda fiat sa cuota obligatòria chi s'istugiaiat in sos magasinos a prètziu favorèvole pro su bisòngiu de sas tzitades, e s'ùrtima, su prètziu de su trigu chi abarraiat pro su mercadu internu), ancora si agiunghent sas ispeculatziones de sos mercantes (issos puru sugetos a tassatziones comente sa saca e sa litzèntzia guvernativa), sena contare sa mancàntzia de tzertesa istàbile de sa regorta sugeta a su clima.