Caraterìsticas de s’Istadu modernu (dae su XIV a su XVIII sèculu)

A su comintzu de s'edade de su Rinaschimentu si presentaiat un'idea noa de Istadu cun printzìpios chi si cuntraponiant a sos de s'edade feudale.

Custos printzìpios fiant: s'atzentramentu de su guvernu, s'organizatzione de su podere de sos ufìtzios chi at a èssere identificada comente burocratzia, s'unificatzione legislativa, chi sunt sas lees iscritas e bàlidas pro totu su territòriu, e in finis - pro s'isvilupu de sa crèschida econòmica e a pustis s'espansione de sos cummèrtzios- s'isvilupu de unu mundu de valores materiales.
In sos sèculos chi andant dae su XV a su XVIII, s'ant a formare sos printzipales Istados modernos de s'Europa, comente sa Frantza, s'Inghilterra e s'Ispagna.
Est in custu perìodu chi s'ant a isvilupare meda sas teorias polìticas. S'at a ispàrghere, tra sas àteras, sa teoria de Machiavelli. Issu - tenende contu de sa realidade de cussu perìodu - proponiat sa separatzione de sa morale individuale dae sa de s'Istadu, e cun su cuntzetu de sa resone de s'Istadu isvinculaiat su prìntzipe dae cada norma morale in sa creatzione de un'Istadu làicu, enèrgicu e autorèvole.

• < Prec
• Succ >